យល់ដឹងអំពី KHQR

 KHQR Code ជាអ្វី?

KHQR Code មកពីពាក្យពេញថា Khmer Quick Response code។ KHQR ត្រូវបានធនាគារជាតិនៃកម្ពុជាប្រកាសដាក់ឱ្យប្រើប្រាស់ដោយអាចធ្វើអន្តរប្រតិបត្តិការបាន។ មានន័យថា គ្រាន់មានតែ KHQR Code តែមួយ អ្នកនឹងអាចទទួលការទូទាត់ពីគ្រឹះស្ថាន ធនាគារ និង E-wallet ជាច្រើនបានទាំងក្នុងស្រុក និងអាស៊ាន(មិនទាន់ធំទូលាយ)បានផងដែរ។  ដូចនេះម្ចាស់អាជីវកម្មលែងត្រូវការស្លាកសញ្ញា QR Code ច្រើនស្ថាប័នទៀតហើយ ចំណែកអតិថិជនអាចរីករាយជាមួយការប្រើប្រាស់ App ណាមួយដែលខ្លួនពេញចិត្តដើម្បីធ្វើការទូទាត់។

បញ្ជាក់: ខ្ញុំបានសាកល្បងប្រើកម្មវិធីធនាគារចល័តរបស់គ្រឹះហិរញ្ញវត្ថុមួយចំនួន ឃើញថាមាន App ខ្លះអាចស្កេនបាន និងខ្លះទៀតស្កេនមិនទាន់បាន។ នេះអាចបណ្តាលមកពីភាពយឺតយ៉ាវរបស់ស្ថាប័នទាំងនោះដោយសារបញ្ហាកូវីដ 19  ក៏ថាបាន។

តោះសាកមើលទាំងអស់គ្នាជាមួយ QR Code ខាងក្រោមនេះ

ខ្សែបណ្តោយ និងខ្សែស្រប

ពេលយើងរៀនថ្នាក់បឋមសិក្សា និងមធ្យមសិក្សា ក្នុងមុខវិទ្យាភូមិវិទ្យាយើងតែងស្គាល់អំពីការកំណត់ទីតាំងប្រទេសកម្ពុជាស្ថិត​នៅ​ចន្លោះ​ខ្សែស្រប​ទី​១០ និង​ខ្សែស្រប​ទី​១៥ នៃ​រយៈ​ទទឹង​ខាងជើង និង​នៅ​ចន្លោះ​ខ្សែ​បណ្ដោយ​ទី​១០២ និង​ខ្សែ​បណ្ដោយ​ទី​១០៨ នៃ​រយៈ​បណ្ដោយ​ខាងកើត ។ តើអ្វីជាខ្សែបណ្តោយ និងខ្សែស្រប?

ខ្សែបណ្តោយ

ខ្សែបណ្ដោយ ឬខ្សែមេរីឌីយាង (Meridian) គឺជាងអ័ក្សប្រឌិតនៅលើផ្ទៃផែនដី ដែលតភ្ជាប់ប៉ូលខាងជើងនិងប៉ូលខាងត្បូង កាត់តាមរយៈបណ្ដោយកំនត់មួយ។ ទីតាំងរបស់ចំនុចមួយនៅលើខ្សែបណ្ដោយកំនត់ដោយរយៈទទឹងរបស់វា។ គ្រប់ខ្សែបណ្ដោយទាំងអស់កែងទៅនឹងគ្រប់ខ្សែស្របនៅរាល់ចំនុចកាត់គ្នា។ ខ្សែបណ្ដោយទាំងអស់មានប្រវែង ២០ ០០៣,៩៣គ.ម ស្មើៗគ្នា គឺស្មើនឹងពាក់កណ្ដាលបរិមាត្រផែនដី។

ខ្សែបណ្ដោយដែលកាត់តាមមជ្ឍមណ្ឌលហ្គ្រីនវីច (អង់គ្លេស) ត្រូវបានគេចាត់ទុកជាគោល(រយៈបណ្ដោយ0o និងត្រូវបានគេដាក់ឈ្មោះថាខ្សែបណ្ដោយហ្គ្រីនវីច។ ខ្សែបណ្ដោយដទៃទៀតកំនត់ដោយមុំដែលមានកំពូលនៅផ្ចិតផែនដី និងមានរង្វាស់មុំ(តាមអេក្វាទ័រ)ធៀបទៅខ្សែបណ្ដោយហ្គ្រីនវីច។ ដោយមួយជុំមាន 360o ខ្សែបណ្ដោយដែលនៅម្ខាងទៀតនៃខ្សែបណ្ដោយហ្គ្រីនវីចមានរយៈបណ្ដោយ 180o ។ខ្សែបណ្ដោយដែលនៅចន្លោះពី 0oទៅ180o ក្នុងរយៈទទឹងខាងលិចស្ថិតនៅក្នុងអឌ្ឍគោលខាងលិច (ខាងលិចខ្សែបណ្ដោយហ្គ្រីនវីច) ហើយ ខ្សែបណ្ដោយដែលនៅចន្លោះពី 0oទៅ180o ក្នុងរយៈទទឹងខាងកើតស្ថិតនៅក្នុងអឌ្ឍគោលខាងកើត (ខាងកើតខ្សែបណ្ដោយហ្គ្រីនវីច)។

ខ្សែស្រប

ខ្សែស្រប(Parallel)គឺជាខ្សែប្រឌិតស្របជាមួយនឹងខ្សែអេក្វាទ័រ។ ខ្សែអេក្វាទ័រ (ក៏​ហៅ​ជា ភូមធ្យរេខា) ជាខ្សែប្រឌិតដែល​គូសខ័ណ្ឌចែកផែនដីជា២អឌ្ឍគោល គឺ អឌ្ឍគោលខាងជើង​ និង អឌ្ឍគោលខាងត្បូង។ ពាក្យ​ «អេក្វាទ័រ» (អង់គ្លេស៖ equator) មក​ពី​ពាក្យ «equate» មាន​ន័យ​ថា ធ្វើ​ឲ​ស្មើ ។ ឯ​ពាក្យ «ភូមធ្យរេខា» គឺ​ពាក្យ​ក្លាយ​មក​ពី​ភាសា​បាលី « भूमध्यरेखा » (Bhūmadhyarēkhā) ដែល​ចេញ​មក​ពី​ពាក្យ ភូមិ (ផែន​ដី, ដី, ...)។ រេខា (ស្នាម, គំនូស, ...) ។ ខ្សែអេក្វាទ័រមានរយៈទទឹង 0o។ ខ្សែអេក្វាទ័រប្រវែងសរុបប្រហែល​ ៤០០៧៥ គ.ម។ ខ្សែស្របនៅខាងជើងអេក្វាទ័របង្ហាញអំពីរយៈទទឹងខាងជើង ដែលមានរយៈទទឹងពី 0o នៃអេក្វាទ័រដល់ 90o នៃប៉ូលខាងជើង។ ចំណែកខ្សែស្របខាងត្បូងអេក្វាទ័របង្ហាញពីរយៈទទឹងខាងត្បូង ចន្លោះពី 0o ដល់ 90o មកដល់ប៉ូលខាងត្បូង។

ខ្សែដៀវ One string

   ខ្សែដៀវជាឧបករណ៍ភ្លេងខ្មែរបុរាណដែលមានឆ្លាក់នៅលើប្រាសាទបុរាណខ្មែរ ហើយគេអាចហៅឈ្មោះបានច្រើនបែបដូចជា ខ្សែឯក ឯកតន្រ្តី ឬខ្សែមួយ ហើយភាសាអង់គ្លេសហៅថា One String។ វាជាឧបករណ៍ដ៍កម្រមួយ ដែលមនុស្ស ៨០ ទៅ ៩០ភាគរយមិនបានស្គាល់ថាវាជាអ្វី។

   ខ្សែដៀវជាឧបករណ៍តន្ត្រី មានខ្សែមួយ។ គេប្រគំវាក្នុងវង់ភ្លេងអារក្ស និងវង់ភ្លេងការបុរាណ*។ តែក្រោយមកគេឃើញលោកតាក្រមង៉ុយយកមកប្រគុំតែឯងអមជាមួយកំណាព្យរបស់គាត់។

    វាចែកចេញជា ដង ព្រលួត ប្រអប់សំនៀង ខ្សែសំនៀង ខ្សែក និងក្រចកកេះ។ ដងធ្វើអំពីឈើរឹងមានរាងមូលរាវ ងខាងចុង។ ប្រអប់សំនៀងធ្វើអំពីសម្បកឃ្លោកទុំ(ឃ្លោកក្អម) ខ្សែសំនៀងមានមួយធ្វើអំពីលួសរស់ ឬលង្ហិន។

   ក្រោយសម័យរបបប្រល័យពូជសាសន៍ ប៉ុល ពត ជីវិតនៃនៃឧបករណ៍នេះស្ទើតែរលាយសូន្យ ដោយសារតែសល់តែអ្នកចេះលេងឧបករណ៍តែម្នាក់គត់ គឺលោកតា សុខ ឌុច។ លោកតា សុខ ឌុច ត្រូវបានក្រសួងវប្បធម៌និងវិចិត្រសិល្បៈ តែងតាំងជាព្រឹទ្ធាចារ្យ ខ្សែដៀវ។ លោកព្រឹទ្ធាចារ្យបានផ្ទេរចំណេះមកដល់កូនចៅខ្មែរមួយចំនួនមុនពេលលោកបានបាត់បង់ជីវិត។

   ឧបករណ៍មួយនេះគឺពិបាករៀនជាងឧបករណ៍ផ្សេងៗទាំងអស់ ដោយសារវាមានខ្សែតែមួយ។ ខ្ញុំសង្ឃឹមថាឧបករណ៍នេះនឹងមានអ្នកចូលចិត្តច្រើន រស់ឡើងវិញនៅពេលណាមួយ។

(* វង់ភ្លេងការបុរាណ មានកំណើតជាង២០០០ឆ្នាំមកហើយ។ ដើមឡើយគេប្រើវង់ភ្លេងនេះប្រគំក្នុងពិធីលៀងអារក្ស។

លុះក្រោយមកគេប្រើវាសម្រាប់ប្រគំក្នុងពិធីអាពាហ៍ពិពាហ៍ទៅវិញ ទើបគេហៅថាវង់ភ្លេងការបុរាណតរៀងមក។

វង់ភ្លេងអារក្ស និងវង់ភ្លេងការជាវង់ភ្លេងមានឧបករណ៍ដូចគ្នា គឺ ទ្រខ្សែ៣ ខ្សែដៀវ ចាប៉ីដងវែង ប៉ីអ ប៉ីពក ស្គរអារក្ស និងឈិង។

វង់ភ្លេងការបច្ចុប្បន្ន គេហៅថាវង់ភ្លេងការសម័យកណ្តាល។)

របៀប Upload វីឌីអូទៅក្នុង Youtube

នារយៈពេលចុងក្រោយនេះ បច្ចេកវិទ្យាមានភាពរីកចម្រើនគួរឲ្យនឹកស្មានមិនដល់។ អ្វីដែលគួរឲ្យចាប់អារម្មណ៍ និងមានការពេញនិយមខ្លាំងនាពេលនេះប្រព័ន្ធទំនាក់ទំនងសង្គម។ Youtube គឺជាកម្មវិធីមួយដែលទទួលការពេញនិយមក្នុងចំណោមបណ្តាញទំនាក់ទំនងសង្គមជាច្រើនដែលអនុញ្ញាតឲ្យយើងស្វែងរកនូវ ព័ត៌មាន វីឌីអូការកំសាន្ត និងការធ្វើការសិក្សាស្រាវជ្រាវ។ល។ ក្រៅពីការចូលទៅទស្សនាវីឌីអូ អ្នកប្រើប្រាស់បណ្តាញសង្គមមួយនេះក៍អាចចែករំលែកនូវវីឌីអូរបស់ពួកគេទៅកាន់អ្នកប្រើប្រាស់បណ្តាញសង្គមមួយនេះនៅជុំុំវិញពិភពលោកផងដែរ។ តើយើងអាចចែករំលែក វីឌីអូរបស់យើងទៅកាន់បណ្តាញសង្គមមួយនេះដោយរបៀបណា? មានអ្នកប្រើប្រាស់ភាគច្រើននៅមិនទាន់បានយល់ទាក់ទង់ហ្នឹងរបៀបចែករំលែកនោះទេ ដូច្នេះថ្ងៃនេះ ខ្ញុំសូមចែករំលែកនូវចំណេះដឹងមួយទៅកាន់អ្នកអានគ្រប់គ្នា ហើយសង្ឃឹមថាក្រោយពីបានអានអត្ថបទនេះរួចអ្នកនឹងអាចប្រើប្រាស់វាបានយ៉ាងរលូន។
សូមចុច Link ដើម្បីទទួលបានឯកសារដែលខ្ញុំបាទបានស្រាវជ្រាវ។